У Нацыянальным мастацкім музеі

11 снежня 2024 г. II-III курсы спецыяльнасцей “Дэкаратыўна-прыкладное мастацтва” i “Дызайн” наведалі Нацыянальны мастацкі музей. Лічу, што пашэнсціла нам у гэты дзень тройчы.

Па-першае, запланаваную лекцыю-экскурсію перанеслі па часе на 40 хвілін. І так мы змаглі наведаць яшчэ адну актуальную выставу – “Страты і вяртанні. Лёс мастацкіх каштоўнасцей Дзяржаўнай карціннай галерэі. 1939 – 1957 гг.”  Выстава падымае пытанне  няпростага лёсу Дзяржаўнай карціннай галерэі БССР, даваенныя мастацкія зборы якой былі самымі багатымі і разнастайнымі сярод музеяў Беларусі. Выстава падзеленая на некалькі ўмоўных частак, які адпавядаюць этапам існавання ўстановы: фарміраванне калекцыі, рабаўніцтва падчас нямецка-фашысцкай акупацыі і вываз твораў у Германію, вяртанне пасля вайны на радзіму, страты і знаходкі музейных прадметаў з ДКГ БССР.

Па-другое, непасрэдна наш экскурсійны занятак па тэме “Беларускае мастацтва ХІІ-XVIII стагоддзяў вёў Дзмітрый Моніч, адзін з лепшых супрацоўнікаў музея. Ён умее распавядаць нават складаныя тэмы простай мовай. Яго хацелася слухаць і слухаць!

Па-трэцяе… Сённяшняя лекцыя – гэта матэрыял аж чатырох пытанняў на экзамен. І калі адказваеш на тэарэтычныя пытанні, уяўляючы арыгінальныя артэфакты, тыя творы мастацтва, якія меў магчымасць бачыць на ўласныя вочы – гэта, канешне, вельмі крута!

Спадарства, наведвайце музеі, гэта будуе нашу Асобу!

В.У. Глаз, ЦК “Агульнаадукацыйныя прадметы”